Jesus Christ Superstar

Yn ystod mis Tachwedd, cafodd bron i fil o bobl yr anrhydedd o weld y sioe
wefreiddiol yma draw yn Neuadd y Glowyr yn y Coed-duon. Perfformiwyd y sioe, o
danarweiniad yr adrannau Drama a Cherddoriaeth, gan ddisgyblion brwd yr ysgol.

Wedi wythnosau o glyweliadau nôl ym mis Mehefin, penderfynwyd mai David Hodges
oedd i chwarae rol flaengar Iesu Grist, Gafyn Poulton oedd i chwarae rol annifyr
Jiwdas, a Sara Chojnacki oedd i chwarae rol Mair Magdalen. Profodd y tri eu bod
yn llawn deilwng o’r rhannau yn fy marn i. Wedi’r apwyntiadau yma, roedd yn awr
gan Mrs Cartin Roberts y dasg anodd o gyfieithu’r sioe o’r Sasneg i’r Gymraeg, ac
yn sicr, haedda ganmoliaeth am ei dawn unigryw.

Wedi misoedd o ymarfer caled, bob nos Lun a nos Iau a dydd Sul roedd ymroddiad
pawb, y corws, y dawnswyr y prif gymeriadau a’r athrawon yn gampus. Gwelwyd
gwelliant sylweddol i’r canu gyda help Miss Odette Jones a Mrs Bethan Phillips,
heb sôn am ein doniau actio a dawnsio o dan gyfarwyddyd Mr Iwan Davies a Miss
Lisa Williams - nid oeddwn yn ymwybodol, i fod yn onest, eu bod yn ddawnswyr mor
ddawnus!! Roedd cyfarwyddiadau deallus Mrs Catrin Roberts yn cryfhau fy sgiliau
i yn bersonol, ac yn cryfhau ansawdd y sioe yn aruthrol.

Yn ystod y perfformiadau eu hun, nos Fawrth, Fercher a Iau, roedd adrenalin pob
aelod o’r sioe ym pwmpio. Roedd gwefr drydannol yn rhedeg drwy’r gynulleidfa wrth
iddynt brofi’r wledd i’r lygad a’r glust, o’r goleuadau llachar, i’r set
anhygoel o wreiddiol, o’r band ysgubol a oedd yn cynnwys rhai o ddisgyblion
blwyddyn 10 i’r canu pwerus. I mi yn bersonol wrth i mi wrando wrth gefn
llwyfan, roedd lleisiau unigryw y prif gymeriadau yn danfon ias i lawr f’asgwrn cefn. Sawl
gwaith teimlais yn emosiynnol wrth wrando ar fy nghyd-ddisgyblion – fy ffrindiau
gorau yn canu mor arbennig. Roedd stori’r Iesu gymaint yn fwy dramatig yn y
ffordd yma, ac roedd gweld wynebau syfrdannol y gynulleidfa’n pwysleisio grym a
diddanwch y sioe i mi.

Yn wir, roedd y sioe yn odidog. Roedd cyd-weithrediad pob aelod o’r cast a’r
athrawon yn adlewyrchu ei llwyddiant. Wedi misoedd o baratoi brwd a thrwyadl,
roedd y perfformiadau’n arbennig iawn. Braint oedd hi, i mi, yn fy mlwyddyn
olaf yn yr ysgol i fod yn rhan o gynhyrchiad mor ffantastig. Hoffwn ddiolch i’r cast
cyfan am eu hymroddiad a’r hwyl a gawsom wrth wneud y sioe. Hoffwn hefyd ddiolch
i bob aelod o’r staff a gyfrannodd at y sioe arbennig hon, ac a’i gwnaeth yn
brofiad hwylus dros ben ac yn brofiad bythgofiadwy.

Gan Gruff Parsons

Poster y sioe gerdd